“O NOME DA CORUÑA”

por Xosé Manuel Sarille
(Publicado n’A Nosa Terra nº 1148)

Cando un sistema político, os gobernos, os tribunais e os partidos, consenten que un canalla incumpra a lei, se burle dela e do parlamento que a lexislou, e que en consecuencia se mofe dos cidadáns que votaron os lexisladores; cando ademais consenten que non acate as sentenzas, e que ría dos xuíces que fallaron, e dos fiscais que insisten oralmente en que a lei e as sentenzas deben cumprirse; cando todo iso sucede, estamos evidentemente ante un canalla, non cabe dúbida, pero tamén, e sobretodo, ante unha democracia do xénero chico, de soportes fráxiles, adubiada por estes tipos que tanto poden airear o nazismo da División Azul, como enviar tropas ao Iraque, ou, neste caso, reptar aos tribunais e aos lexisladores.
O canalla coruñés repta. Mais que ninguén se confunda. Desta vez non afrenta só á Mesa, nin ao galeguismo. Repta ao seu partido, á Xunta e aos xuíces e fiscais. Quere que todos entremos a debater a súa nova proposta, de cambiar o nome da Coruña coa lei de grandes cidades. Ese cambio non é posíbel, pero a cuestión central, sobretodo e antes de nada, é que ese non é o problema, que ese non é o asunto.
O problema que hai aquí, é que un gobernante non cumpre as leis, nin as sentenzas, búrlase e non lle sucede nada. E diso é do que hai que falar, non da retransmisión mediática das ocurrencias que Vázquez vai ter nos próximos meses, aprobando, declarando, e intentando que todos falemos da hipotètica validez ou invalidez da nova lei para o topónimo. O debate é que este individuo é un pésimo exemplo social e un delincuente que basurea, como diría Mario Bunge, a cousa pública .
Cambiando de conversa. Sería unha mágoa que ese asunto do topónimo acochase a nova campaña da Mesa pola Normalización Lingüística, que inicia a nova liña de actuación cunha proposta radicalmente orixinal. Quere A Mesa facer unha bolsa de clientes de bancos dispostos a cambiar as nóminas e as contas para aquela entidade que se comprometa a facer un uso normal do galego. A Mesa entregará á entidade galeguizada os dados dos clientes para que negocien con eles. Estes clientes enviarán antes á Mesa a autorización para que ese contacto se produza.. Se a bolsa é grande serán moitos miles de millóns de pesetas os que se oferezan. Anímense porque imos falar na linguaxe deles.