A Mesa pola Normalización Lingüística
 
 

CAIXA GALICIA E CAIXANOVA

COMPROMÉTENSE CO GALEGO

 

A Mesa agrupou nos últimos meses unha carteira de clientes interesados en realizar en galego as súas xestións financeiras. Foi esta unha campaña innovadora, cunha táctica nunca antes desenvolvida na reivindicación lingüística no Estado español.

O resultado superou as expectativas: Só as nóminas das persoas que forman a carteira de clientes están estimadas en 18 millóns de euros. Así pois, fomos quen de evidenciar unha importante demanda do galego neste sector.

Con esa carteira de clientes, A Mesa comezou a negociar cos principais bancos e caixas de aforro que actúan en Galiza. Varias entidades responderon favorabelmente, sendo tres as que mostraron unha maior receptividade: Caixa Galicia, Caixanova e La Caixa.
 
     
 

O Presidente de Caixa Galicia anunciounos a comezos do ano pasado que a entidade ía comezar o seu proceso de galeguización interna, o que significa agora mesmo que arredor do 80% da documentación pode terse en galego. As conversas entre A Mesa e directivos de Caixa Galicia continuaron e tiveron como resultado que esta entidade desenvolva xa en galego todo isto:

- As campañas financeiras.
- A publicidade nos caixeiros.
- As campañas da obra social.

Ademais, na principal caixa de aforro de Galiza:

  • Dáse opción de elección de idioma nas páxinas web (desde hai pouco, con opción de predición do mesmo).
  • Tamén se pode elixir o galego para as xestións do caixeiro automático.
  • A correspondencia con clientas e clientes é en galego na parte personalizada e a publicidade que acompaña vai tamén nesta lingua.

Caixa Galicia tamén se comprometeu coa Mesa a facer todas estas accións ao longo deste ano 2006:

  • Sinalizar todas as sucursais e os caixeiros automáticos en lingua galega.
  • Sinalizar os predios da obra social en lingua galega.
  • Dar opción de escoller a información en galego nos boletíns electrónicos.
  • Dar opción de elección de idioma na banca telefónica.
  • As anotacións en conta serán en galego, segundo elección do cliente.
Avanzar na galeguización de toda a papelaxe e, cando teñan que ser folletos bilingües por razóns técnicas, colocar o galego como primeira lingua.
       
     
 

As conversas cos directivos de Caixanova concretáronse finalmente cun compromiso segundo o cal:

  • Esta entidade constituíu un equipo de traballo interno para facer seguimento continuado da introdución do galego.
  • As campañas publicitarias implantaranse en galego.
  • Neste ano, introduciranse cambios informáticos para que a lingua de benvinda dos caixeiros sexa o galego.
  • Neste ano, introduciranse cambios informáticos para o envío automático da correspondencia comercial en galego.
  • Tamén neste 2006, a súa web principal terá opción en galego.
       
     
 

É a entidade foránea máis galeguizada. A dirección a nivel galego foi sempre moi receptiva ás solicitudes realizadas pola Mesa, mais aínda non ofrece en galego varios dos seus produtos financeiros.

A súa situación a respecto da nosa lingua é a seguinte:

- A maioría dos seus impresos están monolingües en galego.

- Dan opción de galego na súa web, mais de xeito secundarizado e con varios erros aínda sen corrixir.

- Tamén hai opción automática de galego nos caixeiros automáticos.

- A maioría das súas campañas publicitarias para Galiza son bilingües.

- A rotulaxe das sucursais é parcialmente en galego.
   

 

En oito minutos, mellorarás os servizos dos bancos e caixas



COLABORA!

Precisamos a túa colaboración para conseguir novos logros.
Preme aquí para achegarlle un escrito a túa entidade.