Pergunta do deputado D. Francisco Rodríguez Sánchez sobre declaracións do director do Instituto Cervantes sobre o ensino e valorización das línguas galega, catalá e basca

Á MESA DO CONGRESO DOS DIPUTADOS

Francisco Rodríguez Sánchez, deputado do GRUPO PARLAMENTAR MIXTO (BNG), ao abeiro do disposto no artigo 185 do Regulamento da Cámara, apresenta a seguinte pergunta para a que solicita resposta por ESCRITO, relativa a declaracións do director do Instituto Cervantes sobre o ensino e valorización das línguas galega, catalá e basca.

O dia 18 de Agosto, o Director do Instituto Cervantes, sr. Jon Juaristi, fixo unhas declaracións nas que informaba que diminuira a demanda de ensino do galego, asi como a do catalán e basco, nos centros dependentes deste organismo oficial. Asi mesmo consideraba que a demanda de ensino do catalán e do basco era máis “selectiva” que a do galego, e que o catalán era máis unha língua de “vinculación” que comercial. Neste senso, negaba toda posibilidade ao galego e ao basco como línguas de validez para o comércio. É claro, para o Sr. Jauristi, nengunha delas é unha língua de relación internacional, ainda que no caso catalán exista interese en converté-la nunha língua de relación con Cataluña. Con certeza, deixou claro que o grande obxectivo do Instituto Cervantes era converter o español na segunda língua dos Estados Unidos.

Que centros dependentes do Instituto Cervantes imparten ensino de galego, catalán e basco, e cal foi a evolución do número de alunos, en 2000, 2002 e 2003?

A que se atribui a suposta menor demanda do ensino destas línguas?
Que quer diccr que a demanda de ensino do catalán e basco é máis “selectiva” que a do galego?

Como se argumenta que o galego e o basco no son línguas de validez comercial?

Existe, para o director do Instituto Cervantes, una oficialidade real dunha língua se non se usa para as relacións comerciais?

Non cre que a mellor posición do catalán a respeito do galego, como língua de uso comercial, se debe a que realmente a Generalitat realizou esforzos para que asi fose, e a Xunta de Galiza non, entre outros factores?

Non é exixíbel un maior rigor a un cargo directivo do Instituto Cervantes á hora de valorar a función, usos e validez das línguas que non son o castelán?

Que obxectivos se marca o Instituto Cervantes en relación co ensino da língua galega, catalá e basca, e a difusión destas culturas?

20 de Agosto de 2003
Francisco Rodríguez Sánchez
Deputado pola Coruña (BNG)