Á MESA DO CONGRESO DOS DEPUTADOS

O GRUPO PARLAMENTAR MIXTO, a instancia do deputado Francisco Rodríguez Sánchez (BNG), ao abeiro do disposto no artigo 193 e ss. do vixente Regulamento da Cámara, presenta a seguinte PROPOSICIÓN NON DE LEI, relativa á adecuación da denominación das provincias marítimas de Galiza á legalidade vixente en materia de toponimia, para o seu debate en Comisión.

EXPOSICIÓN DE MOTIVOS

A Lei de Normalización Lingüística de Galiza, no seu artigo 10, estabelece que os topónimos terán como única forma oficial a galega. Esta disposición legal conlevou consecuentemente diversas actuacións lexislativas a nivel estatal como a Lei 2/1998, de 3 de marzo, sobre a mudanza de denominación das provincias de La Coruña e Orense polas de A Coruña e Ourense, ou o Real Decreto 1735/1998, de 31 de Xullo, polo cal se modifica o Código de circulación para mudar as siglas das licenzas de circulación e das placas oficiais de matrícula dos vehículos da Provincia de Ourense. Esta lexislación estatal non fai máis que ratificar e levar a cabo, no ámbito das súas competencias, o estabelecido no artigo 10 da Lei de Normalización Lingüística galega, de 1983.

O estabelecemento das formas orixinarias e galegas dos topónimos como as únicas legais, no uso de toda a administración, responde a unha actitude de lealdade e acatamento ao disposto na lexislación, tanto autonómica como estatal. E parte da consideración de que debe haber unha soa forma para designar oficialmente os nomes de lugares e de que esta debe ser a orixinaria, non a deturpada, deformada caprichosamente nun momento histórico preciso. A posición para o uso oficial da toponimia debe ser coherente co criterio do respeito pola forma orixinal, en todos os casos.

No Real Decreto 3209/1973, de 14 de Decembro, polo que se denominan e limitan as zonas marítimas, estabelécense as demarcacións territoriais e divídese o litoral en provincias e distritos marítimos, que continúa a estar vixente. Nel a denominación dalgunha provincia marítima de Galiza non corresponde ao estabelecido legalmente na actualidade, como é lóxico, xa que non se respeita a forma orixinaria, galega. Está en aberta contradición con toda a lexislación vixente nesta materia.

PROPOSICIÓN NON DE LEI

O Congreso dos Deputados insta ao Goberno a modificar o Real Decreto 3209/1973, de 14 de Decembro, de forma que a denominación das provincias marítimas de Galiza se adecúe ao estabelecido pola lexislación vixente en materia de toponimia.

4 de Maio de 2004
 

Francisco Rodríguez Sánchez
Portavoz G.P. Mixto
Deputado por A Coruña

*Tradución realizada pola Mesa pola Normalización Lingüística.