Á Mesa do Parlamento

Bieito Lobeira Domínguez, deputado do Grupo Parlamentar do Bloque Nacionalista Galego (BNG), ao abeiro do disposto no Regulamento da Cámara, apresenta a seguinte Pregunta para a súa resposta escrita, relativa ás razóns do risco de sinistro entre un volanteiro de Malpica e un buque gaseiro.

O 5 de Marzo o volanteiro “Nueva Ave del Mar”, con porto base en Malpica, mentras se encontraba faenando nun caladoiro tradicional, a unhas sete millas ao norte de Caión, estivo a piques de ser embestido polo butaneiro “Greenwich”, con procedencia do porto da Coruña.

O patrón do pesqueiro utilizou a canle 16 VHF de emerxencia, sendo recebido por Madrid-Diana, non pola estación radiocosteira da Coruña. Pretendendo alertar ás autoridades marítimas da situación de risco obxectivo que padecía, o seu chamado foi infrutuoso, en canto o persoal de guarda de Madrid descoñecía o idioma galego (empregado polo patrón do volanteiro), e atendendo ao feito escandaloso de non existir cobertura radar na área sinalada.

Afortunadamente, e por unha escasa marxe, non houbo que lamentar perdas humanas nin materiais. Agora ben, o risco sofrido, e a clamorosa falta de resposta do dispositivo de salvamento, evindencian que é moito o que hai que mellorar no que respecta aos meios de control e salvamento marítimo no litoral galego.

Estas son as razóns que levan ao BNG a formular as seguintes preguntas para a súa resposta escrita.

1ª) Era legal nese momento a rota do butaneiro “Greenwich” fóra do Dispositivo de Separación do Tránsito Marítimo de Fisterra, e en tránsito por un caladoiro tradicional da nosa frota pesqueira?

2ª) Figura o buque “Greenwich” na base de dados do GMDSS?

3ª) Avisouse ao gaseiro do seu rumo de colisión?

4ª) Por que razón o CZCS de Fisterra non actuou de xeito imediato na canle 16  VHF?

5ª) Considera normal a Xunta de Galiza que un buque galego en risco de colisión non poida utilizar o idioma galego através do regramentario canle 16 VHF?

6ª) Como é o posíbel que non exista cobertura radar á altura de Caión?

7ª) Vaise iniciar unha investigación por este motivo?

8ª) Ten a previsto a Xunta de Galiza demandar medidas de mellora de control do tránsito marítimo na citada área?

9ª) Vaise dirixir o Goberno galego ao Ministerio de Fomento e SASEMAR, a fin de posibilitar o emprego da lingua galega nas canles de emerxencia, e que este feito non supoña risco, ou diminución da capacidade de resposta do operativo de salvamento?

Santiago de Compostela, 9 de Marzo de 2004

Asdo. Bieito Lobeira Domínguez
Deputado do G.P. do BNG