Á Mesa do Parlamento

O deputado Eduardo Gutiérrez Fernández, do Grupo Parlamentar do Bloque Nacionalista Galego (BNG), ao abeiro das normas supletorias do 29 de Xaneiro de 2002, apresenta a seguinte Pregunta dirixida ao Presidente da Xunta para a sua resposta oral en Pleno.

O dia 12 de xullo de 2003, o plenário da Real Academia Galega aprobou as Normas Ortográficas e Morfolóxicas da Lingua Galega. Ao chamado acordo normativo chegouse despois dun longo proceso de traballo no que participaron expertos das tres Universidades galegas e mais da Real Academia Galega e o Instituto da Lingua Galega. A proposta final foi elevada á Real Academia Galega que é a institución competente por disposición legal para estabelecer a normativa e dictaminar cal é o uso correcto da lingua, en virtude do estabelecido na disposisición adicional da Lei 3/1983 de Normalización Lingüística.

Até o momento a Xunta de Galiza non se dou por enteirada dunha novidade tan importante que depende do disposto por unha Lei, e isto pesie a que entidades e organizacións de todo tipo reclamaron información da Dirección Xeral de Política Lingüística, asi como, a adopción oficial do texto normativo e a sua publicación no Diario Oficial de Galiza. No último debate de Política Xeral –o chamado debate sobre o estado da autonomía- o Grupo Parlamentar do Bloque Nacionalista Galego presentou unha proposta de resolución neste mesmo sentido que incribelmente o grupo maioritario da Cámara rexeitou converténdose en insubmiso a respeito da lexislación galega.

Por todo o exposto queremos preguntar:

¿Por qué razóns a Xunta de Galiza non adopta de xeito oficial o acordo normativo aprobado pola Real Academia Galega o dia 12 de xullo de 2003?
Santiago de Compostela, 25 de Febreiro de 2004.

Asdo.: Eduardo Gutiérrez Fernández
Deputado do G.P. do BNG
Xosé Manuel Beiras Torrado
Portavoz do G.P. do BNG