Á Mesa do Parlamento

Tereixa Novo Arrojo, Xesús Veiga Buxán e Eduardo Gutiérrez Fernández, deputada e deputados do Grupo Parlamentar do Bloque Nacionalista Galego (BNG), ao abeiro do Regulamento da Cámara, apresentan a seguinte Interpelación, relativa á aplicación das Normas ortográficas e morfolóxicas do idioma galego, no sistema educativo.

A Lei de Normalización Lingüística, na súa disposición adicional, recoñécelle á Real Academia Galega o criterio de autoridade para estabelecer a normativa e ditaminar cal é o uso correcto da lingua, temén a súa actualización e revisión.

En cumprimento deste mandato, a Real Academia Galega aprobou en sesión plenaria celebrada o 12 de xullo de 2003 unha serie de modificacións na normativa do noso idioma, como xa se fixera tamén no 1995, e que a Academia deu a coñecer como único texto oficial a través da publicación titulada “Normas ortográficas e morfolóxicas do Idioma Galego”.

Dada a importancia e trascendencia que a aplicación destas modificacións ten no ámbito do sistema educativo, pois é o principal medio (ou debería selo) para o alumnado galego coñecer e practicar correctamente o noso idioma, e entendendo que é prioritaria a aplicación das modificacións aprobadas, para normalizar canto antes a situación, é polo que desexamos que o Sr. Conselleiro de Educación e Ordenación Universitaria explique en sede parlamentaria as medidas adoptadas pola Xunta de Galiza para a aplicación da normativa oficial do Galego no sistema educativo.

Por todo o exposto apresentamos a seguinte Interpelación

1.- Á data de hoxe, cales son as medidas adoptadas pola Consellaría de Ed. e O.U. para que no sistema educativo se apliquen e ensinen as modificacións aprobadas pola R.A.G. para as Normas Ortográficas e Morfolóxicas do Idioma Galego?

2.- Ten remitido a Consellaría aos centros de ensino, tanto públicos como privados algunha, circular ou instrución para a aplicación da nova normativa?

3.- De que modo e maneira se lle van dar a coñecer as modificacións aprobadas á totalidade do profesorado e do persoal non docente dos centros?

4.- Que medidas se van levar adiante para efectivizar a apliación da normativa oficial na burocracia e documentación de todos os centros de ensino, tanto públicos como privados, asi como no ambito da propia administración educativa?

5.- Como vai garantir a administración educativa a utilización da normativa oficial nos libros de texto e nos diferentes materiais didácticos e curriculares?

6.- Ten marcado, a administración, algúns obxectivos e prazos para efectivizar na práctica da realidade educativa a aplicación da normativa vixente?

7.- De que partida orzamentaria van sair os recursos económicos necesarios?

Santiago de Compostela a 10 de Marzo de 2004

Asdo. Tereixa Novo Arrojo
Xesús Veiga Buxán
Eduardo Gutiérrez Fdez.
Deputada e deputados do G.P. do BNG.