Á Mesa do Parlamento

Tereixa Novo Arrojo, Xesús Veiga Buxán e Eduardo Gutiérrez Fernández, deputada e deputados do Grupo Parlamentar do Bloque Nacionalista Galego (BNG), ao abeiro do Regulamento da Cámara, apresentan a seguinte Pregunta, para a sua resposta oral en Comisión, relativa á modificación das Normas ortográficas e morfolóxicas do idioma galego, e a sua aplicación no sistema educativo.

A Lei de Normalización Lingüística, na súa disposición adicional, recoñécelle á Real Academia Galega o criterio de autoridade para estabelecer a normativa e ditaminar cal é o uso correcto da lingua, temén a súa actualización e revisión.

En cumprimento deste mandato, a Real Academia Galega aprobou, en sesión plenaria celebrada o 12 de xullo de 2003, unha serie de modificacións na normativa do noso idioma, como xa se fixera tamén no 1995, e que a Academia deu a coñecer como único texto oficial a través da publicación titulada “ Normas Ortográficas e Morfolóxicas do Idioma Galego”.

Dado que é dentro do sistema educativo onde se aprenden as normas do noso idioma, a traslación ao mesmo das modificacións aprobadas é de suma importancia e trascendencia para o alumnado galego coñecer e practicar correctamente o noso idioma e para normalizar canto antes a situación.

Mais dado que todo isto non se pode facer de xeito improvisado, é polo que apresentamos a seguinte pregunta para a sua resposta oral en Comisión:

1.ª) Cales son as medidas adoptadas pola Consellaría de Educación e Ordenación Universitaria para trasladar ao sistema educativo as modificacións aprobadas pola R.A.G. para as Normas Ortográficas e Morfolóxicas do Idioma Galego?

2.ª) Ten remitido a Consellaría aos centros de ensino, tanto públicos como privados algunha circular ou instrución para a aplicación da nova normativa?

3.ª) De que modo e maneira se lle van dar a coñecer as modificacións aprobadas á totalidade do profesorado e do persoal non docente dos centros?

4.ª) Que medidas se van levar adiante para efectivizar a apliación da normativa oficial na burocracia e documentación de todos os centros de ensino, tanto públicos como privados, asi como no ámbito da propia administración educativa?

5.ª) Como vai garantir a administración educativa a utilización da normativa oficial nos libros de texto e nos diferentes materiais didácticos e curriculares?

6.ª) Tense marcado, a Xunta de Galiza, algúns obxectivos e prazos para efectivizar na práctica da realidade educativa a aplicación da normativa vixente?

7.ª) De que partida orzamentaria van sair os recursos económicos necesarios?

Santiago de Compostela, 17 de Marzo de 2004

Asdo. Tereixa Novo Arrojo
Xesús Veiga Buxán
Eduardo Gutiérrez Fdez.
Deputada e deputados do G.P. do BNG.