Á Mesa do Parlamento

Ana Belén Pontón Mondelo e Eduardo Gutiérrez Fernández, deputada e deputado do Grupo Parlamentar do Bloque Nacionalista Galego (BNG), apresenta a seguinte Interpelación, relativa á efectividade das políticas destinadas á normalización do uso do idioma galego entre a mocidade.

A situación lingüística da nación dista moito dese bilingüismo hármonico do que fai gala á Xunta de Galiza, sendo mais acaído falar dunha situación na que a língua propia ou xenuina da Galiza, fica desprotexida en diversos ámbitos, sen obter por parte dos poderes publicos a promoción necesaria para a súa normalización.

Así, diferentes estudos sobre a situación do noso idioma sinalan a perda de galegofalantes acusada entre a povoación mais nova. O Mapa Sociolingüístico Galego certifica a perda alarmante de falantes na poboación de menor idade. Máis concretamente cincuenta pontos porcentuais separan os tramos de idade de 65-80 anos e 15-26 anos, en canto as persoas que teñen o galego como lingua inicial. Tal situación compromete un dos piares básicos na normalización lingüística como é a conservación familiar dos usos da lingua.

Os dados do censo de 2001 son tamén reveladores neste aspeito. Descende o nível de usos nas cidades e vilas máis importantes poboacionalmente:  ascende o número de persoas que afirman non usar nunca o galego, pasando de 162 mil a 332 mil as persoas que declaran non usar a língua do País en ningunha circunstancia.

Recentemente a Real Academia Galega (RAG) elaborou un estudo –con entrevistas ao redor de 1.000 mozos e mozas– do que se desprenden datos moi negativos no referido ao uso e percepcións da mocidade  sobre o idioma galego.

Entre as conclusións do mesmo constátase como se manteñen unha serie de prexuizos e estereotipos negativos para a normalización do noso idioma:

• Os que se expresan con fonética galega son considerados como un grupo pouco dotado para o éxito social, mentres que os que o fan en lingua galega cunha fonética similar ao castelán son caracterizados como un grupo innovador e socialmente competente.

• Mantéñense estereotipos asociados aos galegofalentes: o do “paleto” ou asociación a unha ideoloxía nacionalista.

• A mocidade atópalle pouca utilidade social ao uso do galego, asociándose con profesións de baixo prestixio, polo que as motivacións de tipo instrumental para o seu uso son escasas.

• Estas consideracións son máis pexorativas cando quen fala é unha muller.

Estos datos poñen en cuestión o atinado do proceso de normalización lingüística na nosa nación, constatándose unha perda constante de galegofalantes entre as xeracións máis novas, así como a pervivencia de prexuizos tradicionais que se consideraban superados, mais que se transmiten xeración tras xeración.

Desde o BNG insistimos, máis unha vez, na necesidade de que o Goberno Galego aposte de xeito decido por normalizar o uso do idioma, considerándoo unha cuestión prioritaria que debe levar aparellada  unha maior atención ás actitudes e usos lingüísticos que se rexistran entre a mocidade, impulsando a eliminación desos prexuizos e fomentando a utilización do idioma entre os máis novos e novas.

Polo dito formúlase a seguinte interpelación:

1ª) Como valora a Xunta de Galiza o nível de uso do idioma galego entre a mocidade?

2ª) Como valora a Xunta de Galiza a pervivencia de prexuizos entre a mocidade sobre o uso do idioma galego?

3ª) Considera a Xunta de Galiza que o sistema educativo está a cumprir a función de normalizar o uso do idioma galego?

4ª) Que campañas ou actividades desenvolve a Xunta de Galiza para fomentar o uso do galego entre a mocidade?

5ª) Que campañas ou actividades desenvolve a Xunta de Galiza para incrementar a percepción de utilidade da lingua galega, e consecuentemente, o seu nível de uso entre a mocidade?

6ª) Ten programado a Xunta de Galiza medidas efectivas para incentivar  unha presenza normalizada do galego naqueles ámbitos onde se move a mocidade, especialmente no relacionado coas actividades de ocio e lecer?

7ª) Considera a Xunta de Galiza que os medios de comunicación de tituaridade pública son un activo entre a mocidade á hora de incentivar a utilización da lingua galega?

Santiago de Compostela, 24 de Xuño de 2004

Asdo. Ana Belén Pontón Mondelo
Eduardo Gutiérrez Fernández
Deputada e Deputado  do G.P. do BNG