Á Mesa do Parlamento

O Grupo Parlamentar do Bloque Nacionalista Galego (BNG), por iniciativa da sua deputada Ana Belén Pontón Mondelo, e ao abeiro do Regulamento da Cámara, apresenta a seguinte Proposición non de lei para o seu debate en Comisión, relativa ao fomento do uso do galego entre a mocidade.

Diversos estudos sobre a evolución do proceso de normalización lingüística na Galiza sinalan a perda de galegofalantes acusada entre a povoación mais nova. Asi o Mapa Sociolingüístico Galego oferece información estadística a este respeito certificando a perda alarmante de falantes na poboación de menor idade. Máis concretamente cincuenta pontos porcentuais separan os tramos de idade de 65-80 anos e 15-26 anos, en canto á posesión do galego como lingua inicial. Tal situación compromete un dos peares básicos na normalización lingüística como é a conservación familiar dos usos da lingua.

Os dados do censo de 2001son tamén reveladores neste aspeito. Descende o nível de usos nas cidades e vilas máis importantes poboacionalmente. Así ascende o número de persoas que afirman non usar nunca o galego, pasando de 162 mil a 332 mil as persoas que declaran non usar a língua do País en ningunha circunstancia. Crece, mais moi tenuemente o número de persoas que declaran usar o sempre o galego.

Os dados deste censo poñen en cuestión, alén do dito, o atinado do proceso de normalización lingüística no ámbito educativo. Chama a atención a existencia dunha elevada percentaxe de mozos e mozas que afirman non sentirense capaces de ler ou escreber en galego. É significativo o feito de que no tramo entre 10-14 anos haxa máis persoas que saiban escreber en galego (96,58%), que aquelas que consideran que o saben falar (88,73%). Mais, conforme avanza a escolarización, o nível de desgaleguización aumenta, indicativo de que o ensino non cumpre coa función normalizadora que sería desexábel.

Nesta tesitura,  asAdministracións públicas deberían de tomar nota e actuar, dado que non se acada o obxectivo de que todos os nenos e nenas escolarizadas, rematen co mesmo coñecemento das duas línguas oficiais. A deixadez da Xunta, ante o reiterado incumprimento do decreto 247/95, propicia que esta situación se perpetúe e acentúa as tendencias actuais.

A disminición de uso do galego entre a xente nova (cunha liña decrecente) é un grave problema para a conservación e normalización da língua. Neste fenómeno inflúe o feito de que o noso idioma ten unha presenza reducida na sociedade, concretamente, nos espazos de lecer e ócio da mocidade. Así internet, revistas, televisión, prensa, cine ou música, distribúense maioritariamente en español sendo a presenza do galego residual ou anecdótica. Esto leva aparellado a que non se visualice a nosa lingua como normal nestos ámbitos, influindo de xeito negativo nunha revitalización e promoción dos usos lingüísticos da mocidade en galego.

Polo dito formulase a seguinte proposición non de lei para o seu debate en Comisión:

O Parlamento insta á Xunta de Galiza a:

• Garantir o cumprimento do Decreto 247/95, que regula os mínimos legais de docencia en galego no ensino non universitario.

• Promover campañas específicas para promover específicamente o uso do galego entre a mocidade, neste sentido, os medios de comunicación de titularidade pública deberán ter unha programación estábel no tempo.

• Promover e incrementar o número de páxinas web en galego, facendo énfase naquelas temáticas que teñen un especial interese para a mocidade.

• Colaborar coas entidades dinamizadoras do uso social e público do galego, especialmente coas asociacións e colectivos xuvenís que teñan como prioridade animaren ao uso do galego por parte da xuventude.

• Incrementar o nível de uso do galego nas actividades de ocio e tempo de lecer da mocidade, nomeadamente no cinema e na música.

• Crear unha publicación para a xuventude en galego, con contidos de actualidade (axeitados aos intereses da mesma), que conte coa colaboración do tecido xuvenil e que se distribúa masiva e gratuitamente entre a mocidade en escolas, universidades...

Santiago de Compostela, 18 de xuño de 2004.

Asdo.: Ana Belén Pontón Mondelo               Asdo.: Xosé Manuel Beiras Torrado
Deputada do G.P. do BNG                           Portavoz do G.P. do BNG