Presentación

Temos unha lingua que vén de longo, de máis de mil anos atrás con cada un dos seus días, á que Cunqueiro lle desexou, como é ben sabido, outros mil máis de florecemento primaveral. Herdamos unha tradición longa e tamén queremos que longo ben longo sexa o futuro.

A Mesa pola Normalización Lingüística promove a edición desta publicación para tentar cubrir un oco na formación, a información, a análise e o debate sobre a lingua e sociedade no noso país e, tamén, para ollarmos a pluralidade lingüística do planeta. Para sabermos mes a mes os principais acontecementos á volta do galego, para nos achegarmos aos diferentes territorios da Galegofonía e, en moitas ocasións, para coñecermos as batallas que libran outras linguas do mundo para gañaren a normalidade, para seren iguais en dereitos e en deberes.

En cada número, haberá espazo para a opinión e para a análise, atendendo pouco a pouco os máis diferentes ámbitos e sectores, procurando ouvir a voz de todos os axentes involucrados. Do coñecemento e do debate só poden saír resultados positivos.

Comeza agora a andaina. O desexo de quen a impulsamos é que poida servir para que a nosa lingua alongue a súa vitalidade no tempo e en todos os espazos sociais.

Saúde e longa lingua!