ENSINO.- A Mesa saúda a iniciativa de galeguización aprobada pola Federación de Colexios Relixiosos

A Federación de Relixiosos do Ensino Galego (FEREGA) aprobou esta fin de semana unha iniciativa destinada a impulsar o uso da lingua galega nos colexios relixiosos. Para iso, crearán órganos de seguimento que velarán polo cumprimento do Decreto 247/95, que marca as disciplinas mínimas a impartir en galego. Así mesmo, traballarán para que toda a documentación (matrículas, cualificacións, etc.) emanada dos centros que forman esta federación sexa redixida no idioma proprio da Galiza.

Segundo indicaron desde FEREGA, á hora de tomaren esta decisión tiveron en conta as accións desenvolvidas pola Mesa pola Normalización Lingüística cara ao mundo do ensino, así como o feito de que os centros relixiosos sempre son os que fican nos últimos postos nos inquéritos sobre uso do galego.

A Mesa pola Normalización Lingüística saúda esta iniciativa e demanda que o Goberno galego poña tamén en marcha as medidas necesarias para que o ensino deixe de ser a principal maquinaria de desgaleguización. Hai que recordar que o Decreto 247 foi promulgado no ano 1995 e hoxe, case nove anos despois, continúa a incumprirse nun 75% dos centros de ensino. Esta vulneración da legalidade repercute moi negativamente na cualidade da educación e condiciona para mal o presente e o futuro da vida cultural do país.