CINEMA.- Estrea en televisión de Pradolongo mañá martes na TVG
[30/03/2009]
Todas aquelas persoas que aínda non viran a longametraxe Pradolongo, dirixida por Ignacio Vilar e producida integramente en galego, poderán facelo mañá martes a partir das dez da noite, hora na que a TVG estrea o filme, un dos fenómenos do recente audiovisual galego.
De seguro que moitos dos máis de 60.000 espectadores e espectadoras que acudiron ás proxeccións de Pradolongo por toda a xeografía galega grazas á súa innovadora campaña de promoción quererán volver a visionar esta fita, que participou en distintos certames cinematográficos como o de San Sebastián, onde gañou o Premio Cidade de San Sebastián Film Comission. Tamén se fixo co Premio Especial do Festival de Ourense e o Premio á mellor música de longametraxe do Congreso Internacional de Música de Cine de Úbeda. Pradolongo chegou ate a cidade norteamericana de Utah, obtendo o pasado mes de xaneiro o premio “Director´s Choice Gold Medal for Excellence” no Park City Film Music Festival.
|
