A CORUÑA.- A Mesa pídelle ao PSOE que “recapacite” e non faga de “parvo útil” do PP na súa política contra o galego
[29/09/2009]
A Mesa critica que se abra a confrontación nun tema “que a maioría dos veciños e das veciñas da Coruña considera felizmente superado”
A asociación lembra que “o apoio á Lei de normalización lingüística é un dos eixos da manifestación do vindeiro 18 de outubro”
A Coruña, 29 de setembro de 2009.- A Mesa pola Normalización Lingüística convidou á dirección do PSdeG-PSOE a que “recapacite” sobre a importancia de defender o galego e non caia na trampa de facer de “parvo útil” do PP. A asociación considera que este partido político “se dispara nos pés cando fala da posibilidade de derrogar a Lei de normalización lingüística para oficializar topónimos deturpados” e lémbralle que “os nomes de lugar teñen como única forma oficial a xenuína por un acto de xustiza histórica tras a ditadura franquista”.
A entidade en defensa do galego, que impulsou unha batalla xudicial e social contra Francisco Vázquez por se negar a cumprir a lei, critica que se “reabra, ademais de forma crispante, un debate que a inmensa maioría das veciñas e dos veciños da Coruña consideran felizmente superado, independentemente da lingua que utilicen no seu día a día”.
Para A Mesa, “darlle carta de legalidade a que o nome oficial dun lugar poida mudar segundo as maiorías electorais non pode máis que considerarse un disparate”. Así mesmo, afirman que “detrás desta idea subxace a pretensión de borrar a evidencia histórica de que o galego é a nosa lingua propia e que en galego se chamaron os lugares en Galiza desde que Galiza existe como tal”.
A Mesa convida “ás mulleres e homes preocupados por estes anuncios de involución” a que se mobilicen en defensa da Lei de normalización lingüística na manifestación convocada para o vindeiro 18 de outubro pola plataforma Queremos Galego, que sairá ás 12 do mediodía da Alameda de Santiago.
|
