A CORUÑA.- Varias asociacións de veciños da Coruña únense para defender a lingua e o topónimo
[02/11/2009]
Reproducimos o comunicado:
As Asociacións de Veciños e Veciñas: Agra do Orzan, Atochas – Monte Alto – Torre de Hércules, Oza – Gaiteira – Os Castros, Os Rosais e San Pedro de Visma asinan conxuntamente este comunicado:
1º Pór de manifesto o malestar das citadas Asociacións Veciñais pola campaña posta en marcha pola Federación de Asociacións Veciñais sen ter en conta a opinión dos seus asociados.
2º Pór de manifesto que a actuación da Federación de Asociacións Veciñais, ao noso entender, está rexida claramente por intereses partidistas, actuando dita Federación baixo a influencia dun determinado grupo político, deixando de lado as distintas sensibilidades que a día de hoxe expresa a cidadanía.
3º Pór de manifesto que o paso ao fronte dado agora pola Federación, nunca o deu para exixir o cumprimento dunha lei que se estaba a incumprir de xeito irresponsábel por boa parte da clase política desta cidade. E tampouco criticou que se empregasen cartos públicos para tentar xustificar o incumprimento da Lei de normalización lingüística, e se deixasen de empregar en paliar as carencias da nosa cidade.
4º Vémonos na obriga de lembrarlle á Federación o compromiso adquirido pola súa directiva do emprego da lingua galega de xeito voluntario e consecuente. E facemos un chamamento á Federación e á cidadanía para defender con dignidade e orgullo a nosa lingua e os nosos sinais de identidade.
As asociacións asinantes amósanse así claramente en contra da campaña iniciada pola Federación e do xeito partidista no que se esta a empregar o movemento veciñal para tentar manter un discurso galegofóbico, apoiando o ideario partidista dun dos grupos maioritarios do Concello da Coruña.
A Coruña, 29 de Outubro do 2009 |
