MEDIOS DE COMUNICACIÓN.- Importantes pasos para o galego en RNE e TVE
[20/10/2004]
O Deputado do BNG no Congreso, Francisco Rodríguez, presentou na Comisión de Control Parlamentario de RTVE as propostas que A Mesa pola Normalización Lingüística dirixiu ao novo Goberno e aos deputados e deputadas galegas en Madrid. Estas propostas foron aprobadas coa abstención do Partido Popular.
As propostas presentadas pola Mesa, e aprobadas a través da Proposición Non de Lei do BNG, son as seguintes:
- Utilización da toponimia oficial en todos os medios de comunicación do Estado, que nestes momentos son os únicos que non o fan (p. ex., Canal 24 Horas de TVE).
- Equiparar as desconexións horarias de TVE en Galiza coas realizadas en Cataluña, e facer sempre estas desconexións na lingua propria do país. É necesario aumentar o financiamento para produción propria no Centro Territorial da Galiza.
- As desconexións informativas de RNE para Galiza deberán facerse en galego.
- Recuperación dunha emisora de RNE que emita en galego. (Radio 4, de RNE, emitiu en galego até 1992, cando foi suprimida, mais continúa en Cataluña, coa súa función de ser a emisora de RNE que emite integramente en catalán.)
- Nos programas estatais, potenciar a presenza habitual de solistas e grupos musicais que fan uso das diferentes linguas do Estado, incluído o galego. Nestes momentos dáse o paradoxo de que artistas con grande éxito de vendas e con éxito de crítica e público noutros estados non aparecen, ou só aparecen marxinalmente, na grella de TVE.
A deputada socialista Mª Xosé Porteiro, que interviu como vogal do Grupo Socialista durante o debate, mostrou a súa satisfacción pola aprobación desta iniciativa do BNG. Porén, o PSOE transaccionou o texto para que no ponto onde se falaba da recuperación dunha emisora de RNE en galego se sinalase só a posibilidade de estudar a recuperación desta canle. |
