A Mesa pola Normalización Lingüística

POR UN ESTATUTO DE NORMALIDADE PARA O GALEGO

A Mesa pola Normalización Lingüística comeza unha campaña para lles solicitar aos portavoces dos grupos do PSdG-PSOE, BNG e PP o apoio para que no novo Estatuto se recoñeza ao galego todas as garantías dunha lingua oficial.

Podes solicitar material por correo electrónico, por fax: 981 58 37 82, por teléfono: 981 56 38 85 ou correo postal (Apartado 247; 15705 Santiago de Compostela).

3 modelos de cartóns postais para enviar a :

D. Ismael Rego Portavoz do grupo do PSdG-PSOE Hórreo, 63 15702 Santiago de Compostela	D. José Manuel Barreiro Portavoz do grupo do PP Hórreo, 63 15702 Santiago de Compostela	D. Carlos Aymerich Portavoz do grupo do BNG Hórreo, 63 15702 Santiago de Compostela

::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

Texto do cartón postal:

Prezado señor:

Solicítolle que o seu grupo parlamentar promova e apoie que no novo Estatuto se recoñezan ao galego todas as garantías dunha lingua oficial.

Para iso, entendo que deben sinalarse, como mínimo, os seguintes puntos:

Recoñecer o dereito a usar e o deber de coñecer o galego.
Garantir o dereito das persoas a ser atendidas oralmente e por escrito en galego, na súa condición de usuarias e consumidoras de bens, produtos e servizos.
Recoñecer ao galego a condición de lingua vehicular no ensino non universitario.
Regular o uso preferente do galego por parte de todas as administracións situadas en Galiza.

Prégolle que escoite a voz da cidadanía e que este Estatuto poida ser, grazas ao apoio do seu grupo, o Estatuto da normalidade para a lingua propia de Galiza.

Atentamente,

Asdo.:

A EQUIPA DE NORMALIZACIÓN DO IES EDUARDO PONDAL APOIA A INICIATIVA.

A Equipa de Normalización do IES Eduardo Pondal de Santiago de Compostela decidiu aderirse á campaña de "Por un Estatuto de normalidade para a nosa lingua" recollendo sinaturas entre o alumnado do centro e o profesorado do centro. Como somos de Santiago, en vez de que cada alumno envíe o seu postal, co cal hai menos probalbilidade de que chegue polos motivos de esquecimento habitual, recollémolos todos xuntos e entregámolos todos no Parlamento do Hórreo.

É interesante facelo na clase para poder explicar que é un grupo parlamentar, o Estatuto, a lingua oficial como dereito e como deber, a lingua instrumental, que é normalizar unha lingua, de que grupos políticos se compón o parlamento, etc...

Tamén pensamos que é importantísimo que todos e todas tentemos entregar o máximo número de postais, pois dependen da forza da mobilización social as definicións identitarias de Galicia e da súa lingua.

Desde a equipa do IES animamos a todos os centros a participaren, mesmo sería interesante que fose un grupo de alumnos/as os que entregasen as cartas no Parlamento do Hórreo.

Un saúdo, Equipa de Normalización.